I UM SHYNGIAR
Na khap mawsiang i mih pyrthei
Miet la bad sngi i ïai kyrsei.
I umpohlieh ba sngur kdiar kdiar
Lucy jong nga,i um shyngiar.
Jar jar i im, kynjai i tuid
Halor u siej b'la phiah arnuid.
I pynnoh kshaid suki mian mian
Na i kynjang haduh ha tbian.
Pyrthei mariang ka dang ïohthiah
I rwai pasiaw khlem thait khlem ngiah.
Ha miet shai bnai ba peit ka dkhoh
I ïalehkai i sohtyngkoh.
Mynmiet mynstep i ai i bsa
Da ki umksiar ki um rupa.
Laiphew jingthaw ki ïoh dih shngiam
Kumba ki thrang katba ki sliang.
Ha u khiew phiang ba pynap pdiang
Lano in dap in poi ha rmiang.
Ki khmat ki neh ki peit ïa i,
Ki jingpyrkhat kylleng ki jngi.
Katba nang mih ki por ki sngi
I la nang swai, A ! i bapli.
Ïa i ym don ba kheiñ kor shuh
Napoh rud nong, i khlad jynduh.
Haba wan beh ki lyer kynmaw
Ïa i nga tmang, katno nga blaw.
Nga ju leit jngoh ïaki syrwet
A ! ko Lucy hapoh jingtep..
